首爾親子遊

Day 1 2019年12月29日

收工趕零晨機（OZ大韓航空 00:35）去首爾，唔需要請多日假，可以拎多日假同仔女玩餐飽，上機食飽就瞓，瞓醒一覺就到達目的地，絕對係FAMILY TRIP最好嘅選擇。

返酒店（Travelodge Myeongdong Euljiro）放低行李，帶D輕巧嘢就帶3隻馬騮出發去HEA遊！由於酒店實在太方便，無論去南大門、明洞、東大門都係10-20分鐘左右。

經過明洞點都要帶仔女食下地道車仔檔，當日天氣真係好凍，凍到仔女都爭住飲魚糕串熱湯。經過明洞過埋地下隧道，就準備去N SEOUL TOWER。嚟到南山梗係要坐纜車啦！好彩有特別排隊俾長者、嬰孩，唔係唔知要排幾耐，哈哈！

除咗特色帳篷小食之外，當然要試埋地道韓燒啦！

Day 2 2019年12月30日

今日瞓到自然醒，就出發去南大門買童裝，帶住3隻馬騮行程一定唔可能ON SCHEDULE，HAHAHA…最後中途因為小朋友要借廁所就去咗新世界百貨公司，原來童裝部係咁完善，除咗有個好舒適嘅BABY CARE，仲有一個賣玩具嘅地方，3隻馬騮最後玩咗兩個鐘先肯走。

之後我哋再出發去南大門，阿朱媽已經準備收工喇！唯有睇下有冇機會再嚟啦！簡單食個晚飯就返酒店喇！點知我沖沖下涼聽到老婆叫D細路換衫，3隻馬騮大叫: 「爸爸，快D著衫，落雪喇，爸爸，爸爸…」。同老婆拍拖到結婚嚟過幾次都睇唔到，今晚竟然睇到，見到佢哋4個咁開心，幾辛苦都值得。

Day 3 2019年12月31日

今日嘅行程係小朋友天堂，每間都睇下玩下，好快就入黑，大家一定要預多啲時間去弘大呀！

昌信洞文具、玩具綜合市場
中文地址：首爾特別市鐘路區钟路52街
營業時間：09:00~19:00（各店不太一定）
交通：地鐵東大門站、東廟站，出站走路１分鐘

晚餐就喺鐘閣站附近嘅小店 --- 十里黄牛牛小腸 
 
註: 鐘閣((JONGGAK)站出發只需三分鐘路程

Day 4 2020年1月1日
今日入滑雪場喇！一早就出發去坐SHUTTLE BUS，等等下仲開始落大雪…

洪川大明渡假村（Daemyung condo）真係一個適合一家大細嘅地方，每間房都有齊煮食用具，渡假村內有餐廳、超市、便利店、滑雪用品店，應有盡有。

5日假期話咁快就完結，努力工作再為下一次旅程預備。

Louis Chan    專業旅運荃灣分行   
直線電話: 3420 6814
電郵: [email protected]