之前喺香港已經上過幾次郵輪，但每次行程大部份都只能選擇東北亞或者東南亞國家。今次終於扚起心肝去計劃一個歐洲郵輪之旅。點解會選擇去坐歐洲郵輪？因為想去一啲我哋平時唔會去嘅島或比較交通不便嘅地方。最……重要就梗喺去埋歐洲Shopping啦～所以喺我選擇郵輪時，見到麗晶七海郵輪（Regent Seven Seas Cruises）喺全包式航遊體驗，同埋佢所有房間都係全套房設計。仲要咁啱做梗優惠，我就拿拿聲訂咗喇！

航空公司：國泰航空公司
CX 293 00：20—06：35 香港—羅馬
CX 260 12：15—07：00 巴黎—香港

郵輪公司：麗晶七海郵輪（Regent Seven Seas Cruises）

DAY 1
凌晨機由香港出發去羅馬機場，所以選擇咗喺羅馬住一晚冇咁辛苦。我一落機就搭的士直接前往酒店，唔算太貴約400HKD，去到酒店放低行李同埋食咗個早餐後，就前往羅馬鬥獸場，晏晝就去特雷維噴泉。之後，食埋午餐＆雪糕就返酒店附近晚餐和休息。
P.S. 建議午餐要去特雷維噴泉附近巷仔嗰間L'archetto 度食PIZZA

DAY 2
12：00 退房，行去火車站搭火車去Civitavecchia，第一次體驗原來意大利火車會喺開車前幾分鐘先話你知月台係幾號，仲要去Civitavecchia大部份時間都係最遠嗰個25號月台，所以建議心血少嘅朋友，都係選擇坐的士或郵輪接送車直接去碼頭。坐咗大約個半鐘頭火車到碼頭，再搭接駁巴士就可以直接到碼頭上船啦～咁辛苦上到船嘅第一日梗係去食餐好嘢啦！
 
  
DAY 3
今日港口喺佛羅倫斯，我哋參加咗一個一天團係去比薩同埋佛羅倫斯參觀。第一站到咗比薩，比薩斜塔係世界七大奇蹟之一，嚟到當然要影下相啦！ 
之後就去咗佛羅倫斯，喺嗰度梗係要影下老橋，而老橋上面其實好多店鋪可以行，佛羅倫斯係一個好好嘅購物地點。行完之後，最後一定要返去聖十字聖殿度影返張相先好走。
 

DAY 4
今日港口喺La Spezia，我哋參加咗一個一天團係去五漁村參觀。落咗船後，我哋會先去火車站搭火車去Stazione Ferroviaria di Riomaggiore。

其實一直都好想去五漁村，因為真係好想睇到五顏六色既屋，當見到之後真係覺好靚。

DAY 5
今日港口係Ajaccio，我哋參加咗一個行山半天團，之後返回船上休息。

DAY 6
今日港口喺Palma de Mallorca，我哋選擇咗自己落船行下同埋去行MALL。之後當然返去船上Prime 7享用美食啦～落咗船就去左勒塞烏教堂影返張相，之後就去MALL行吓。

DAY 7
今日港口喺巴塞隆納，我哋選擇咗自己落船行下。夜晚就去咗今次船上嘅重頭戲Chartreuse 餐廳享用法國餐（一定要BOOK 位呀）一落船我哋就去咗米拉之家度參觀，之後去咗Reserva Iberica，呢個真的要推薦去嘗試，因為佢啲火腿真係好好味，入口即溶。當你食完Reserva Iberica既火腿後，香港大型超級市場就算買到幾貴既火腿都好，都唔夠Reserva Iberica嘅火腿咁好食，同埋佢有得試食，試啱先買。

 
Chartreuse 餐廳法國餐記得一定要BOOK 位，同埋正常每間房嘅客人係一次航程上只少會俾你食到一餐。如果想試下食法國菜可以試一下。
 

DAY 8
今日港口喺馬賽，我哋選擇咗自己落船行下。因為大部份景點都係以下嘅藍圈內。
  
我哋落咗船沿海邊行過去會見到小販檔，係賣糖炒花生，大約EUR1-2 一包，一定要試下，一路行一路食，一路吹海風真係好寫意。之後可以慢慢行去馬賽主教座堂同埋MuCEM – Museum of Civilizations of Europe and the Mediterranean 影相。

DAY 9
今日我哋喺蒙地卡羅落船，包咗半日車去參觀F1賽車道，蒙地卡羅賭場同埋親王宮之後就搭火車去巴黎玩埋餘下嘅行程啦。

其實大部份人聽到8日係船上面，悶唔悶架？會唔會無嘢做架？我可以話你知一啲都唔悶，地中海郵輪有樣好，差唔多每一日都會有港口俾你落去玩，試諗下每一日訓醒就已經到第二個地方，食完個早餐舒舒服服咁樣落船上車去景點，唔駛自己煩，唔想跟住團行，可以自己搭接駁巴士出去市中心自己行下咁樣，返到上船可以做咩？太多啦……可以睇SHOW，砌下圖，喺露台HEA 下，同埋可以細細聲話俾你知船上面係有麻雀打，所以如果真係有10日假，可以試下去一次麗晶七海郵輪享受一下！