分享上次同大家介紹過「瑞士山區肺策馬特」，今次同大家一齊勇闖「歐洲之巔少女峰」，睇下一班少女去到係咪真係會瘋了！
月黑風高殺蟲夜，上山就梗係越早越好啦！咁點樣去呢？記住，唔使用劍架！坐火車就得架啦！「Yor ku yor ku yor ki ku li Yor hu hu li nor ku ku」大家可以由茵特拉肯或者格林德瓦出發就可以上到少女峰。而我今次就由Grindelwald 出發去到Kleine Scheidegg再轉登山火車就可以直上少女峰啦！不要問只要信，小小貼士，由Grindelwald坐火車個陣記得揀右邊，多好多風景睇架！
經過一架又一架既火車，終於去到全歐洲最高，海拔3,454公尺既少女峰 … 火車站啦！準備，打開閘既時候，成班少女見到漫天風雪嘅興奮程度，連咩係高山症，都已經忘記得一乾二凈啦！提提大家下次上山個陣，最緊要留意自己身體狀況先呀！
整個少女峰都充滿住打卡位，不過如果你真係好想俾全世界都知你去過呢度的話，我介紹你一定要去史芬克斯觀景台！點解要去呢？三大原因：
1. 全歐洲最高天文台，旁邊係阿雷奇冰川
2. 一塊寫住「Jungfraujoch-Top of Europe」嘅藍色呃Like牆
3. 鐵金剛勇破雪山堡拍攝場地，男士可以扮James Bond拯救世界，女士可以係白雪茫茫下幻想自己係 Snow White 一完自己公主夢，Perfect！
離開觀景台會經過冰宮，入面好似個迷宮咁，行行下突然間又會有幾個冰雕係你身邊，個設計都好盞鬼下。不過嘅然山長水遠嚟到，就唔好蝕底，咪入去轉個圈Frozen 一下囉～不過係入面記得小心地滑呀！
最後，離開之前一定要去車站大廳買明信片，記得印佢地個特別郵戳呀！
Gillian Cheung
專業旅運銅鑼灣分行
直線電話: 3959 1531
[email protected]
